بسم الله الرحمن الرحيم، والسلام عليكم ورحمة الله وبركاته

يبدو لي من الردود التي تلقيتها بخصوص سؤالي عن البرامج اللي بتستخدموها في انتاجكم الفني انكم بتستخدموا البرنامج العتيد الموسوم بـ :

"فوتوشوب .. photoshop"

البرنامج بالمرة ليس عليه غبار من حيث الإمكانيات والقوة وكمان الروعه .. لكنني مضطر أن أقول:


الفوتوشوب رائع كنهاية .. ولكنه بلوى كبداية!!!

نعم .. أنا أقول هذا الكلام من واقع تجربتي ومما تعلمته على يد بعض الأستاذة بهذا الخصوص ..

بالمفتشر المفيد:
إذا أردت أن تفجر قواك الفنية وتجعلها تلعلع بإنتاج مبهر ومفيد .... فأبداً لا تبدأ بالمدعو/ فوتوشوب .. ولكن إبدأ بشيئين قبل أن تغامر وتبدأ في استخدامه!!

بالطبع سوف نسأل جميعنا: وما هما هذين الشيئين يا ترى يا أسطى فنان الغفلة/ زرياب؟!!

وأجيبكم قائلاً: هما

* أياديكم الكريمة

و

* أي برنامج "خطوط اتجاهيه"!!

يا للهول .. برنامج "خطوط اتجاهيه" حتة واحده !!!!! إنته قد الكلام الخطير اللي بتقوله ده يا أستاز انته؟!!! .. بس هوه يطلع إيه المدعوق "خطوط اتجاهيه" ده؟!!!! .. مش تفنسر انته بتقول إيه؟!!
ههههههههههههه

سؤال بدهي ومتوقع .. وخلونا نتخيل ان اللي سأله مشرفتنا الكبيرة في القدر والمنزلة/ عيناوية بجنون وهيه في قمة الاستغراب والعصبية كمان .. أصل اللي اتقال مش شوية بردو .. هههههه

طيب طيب يا ستي عيناوية متعصبيش كده وتتنرفزي .. إستأني عليا شوية .. هشرحه بالتالي:
برنامج الخطوط اتجاهيه .. هوه أي برنامج للجرافيكس ديزاين .. يعني للتصميم الفني .. يعني بكل بساطه مش الفوتوشوب اللي هوه للاظهار الفني!!!

أوبااااااااااااااااااااااااااااااااا .. الظاهر شكلنا عقدنا الأمور حبتين .. فنانتنا الكبيرة في القدر والمنزلة/ إمارتية شكلها هتعصب كمان شوية .. اصلها لا يمكن ترضى بالهجايص والألغاز اللي أنا قاعد بخطرف بيها يمين وشمال .. أوكي أوكي ..... واستباقاً مني لحصول أي إشكال فيما بينا (ربنا ما يجيب بينا غير كل خير ومعروف) .. أنا هقول التالي وبسرعه .. بس ركزوا معايا شويتين فيه:
برامج الرسم نوعان:

* برامج "خطوط اتجاهيه" وتتسمى بالانجليزي "vector lines programs" .. وهيا اللي بنستخدمها في إعداد أفكار التصاميم

* برامج "تعديل الصور "photo-editing programs" .. الاسم هنا بيلخبط حبتين .. لكن ممكن نسميها برامج الاظهار الفني .. وهيا اللي بنستخدمها في اظهار التصميم اللي عملناه في برامج الخطوط الاتجاهية بشكل فني راقي قريب للواقع وممكن كمان مختلط بالواقع (مهو احنا ممكن نعمل تصميم كرباج مثلاً على برنامج خطوط اتجاهية .. ونروح بعد كده في برنامج تعديل الصور أو الاظهار الفني .. دامجينه في صورة أخونا وحبيبنا الغالي المرعب وحاطينه في ايده الغالية وهوه بينظر إليا شزراً وربما جزراً كمان وبيقول:
كمل يا أخي وبلاش استطراد .. لحسن أضربك بالكرباج!!
كان نفسي كلمة "استطراد" تنتهي بحرف "ج" عشان يبقى جناس رائع بينها وبين كلمة "كرباج" .. بس ما علينا .. ما كل ما يتمنى اللي مش عارف ايه يدركه !!

المهم .. يبقى نحنا دلوقتي عرفنا نوعين من برامج الرسم واللي لا غنى .. لأ .. خلوني أقولها بعالي الصوت احسن عشان بس تركزوا معايا .. يبقى نحنا دلوقتي عرفنا نوعين من برامج الرسم واللي لا غنننننننننننننننننننننننننننننننننننننننننننننى (وأنا رافع صوتي وعجيرتي بها) لأي فنان عنهما بعد ايده الكريمة .. ارجو انكم تتفقوا معايا في الحتة دي أوي .. لأني عارف ان كثير منا بيفتكر ان انتاج عمل فني محترم بيتطلب فوتوشوب وبس .. لأ .. ده خطأ للأسف .. زي بالزبط ما كثير منا بيفتكر ان تعلم أدوات الفوتوشوب كفيل بأنه يجعله فنان بحق وحقيق .. في الحقيقة .. تعلم الأدوات شيء .. والوصول الى مرتبة فنان يعبر عن افكاره وتصوراته بأقصى قوة ممكنة (يعني بشكل فني) شيء تاني بالمرة .. في الدروس دي .. وبإذن واحد أحد .. فرد صمد .. لم يلد ولم يولد .. ولم يكن له كفواً أحد .. هنمشي مع بعض سنة سنة حسب الخطوات التالية:

أولاً: هنتكلم شويتين عن استخدام أياديكم الكريمة في بداية العمل الفني .. ضروري جداً إننا نثق في الأيادي دي .. ونستخدمها عشان نبذر في العمل الفني جوهره وقلبه اللي هتلف كل حاجة بعد كده في مداره وفلكه .. مش مشكلة إذا دلوقتي مفهمناش بالزبط انا بخطرف بإيه هنا .. لما نبدا هنعرف بالضبط هيه ايه العبارة بالزبط .. ثقوا فيّا .. وباذن الله مش هتخسروا حاجة

ثانياً: هنخش دوغري بعد كده على برامج "الخطوط المتجهة" .. آه صحيح .. إلا بالحقة مذكرناش ليكوا أمثلة عن البرامج دي .. سوري .. حقيقي سوري .. اصل الكرباج وحكاية اخونا المرعب وشزره وجزره شنكلوني حبتين .. ما علينا .. خدوا يا أسيادي عندكوا .. من أمثلة البرامج دي: برنامج "ادوبي الستريتر adobe illustrator" وده بتنتجه نفس شركة الفوتوشوب .. بس عشان تتأكدوا من صحة كلامي الخاص بضرورة استخدام برنامج خطوط متجهة قبل ما نروح للفوتوشوب .. أيضاً من البرامج العتيدة والحلوة في هذا النوع .. برنامج كوريل درو .. ده من اروع ما يمكن .. ولو أنه لا يعلو ابداً على البيه "ادوبي الستريتر adobe illustrator" واللي بيعتبر أفخم حاجة في برامج "الخطوط المتجهة" .. إلا ان الكوريل درو .. وبيتكتب بالانجليزي كده "CorelDraw" .. إلا إن الكوريل درو مش سهل أبداً .. لدرجة ان استخدامه ممكن يغنيك عن استخدام سي "ادوبي الستريتر adobe illustrator" ده .. الكوريل درو بيتميز بأنه فيه دعم للغة العربية .. بينما المدعوق "ادوبي الستريتر adobe illustrator" مفيهوش الحتة دي يخيبه!! .. كمان من البرامج المشهورة في المجال ده .. برنامج "فريهاند freehand" برنامج بسمع عنه انه حلو .. بس محصليش شرف استخدامه .. ما علينا .. المهم هنه اننا في الخطوة التانية هنستخدم برامج "الخطوط المتجهة" في إعداد تصميم العمل الفني بشكل ما قبل الاظهار الفني النهائي .. يعني بنسبه وتكويناته وعلاقات عناصره ببعضها البعض وأمور مهمه وحلوة كتير ... أكيد أكيد هتأثر في نظرتنا للتعامل مع الأشياء !!!

ثالثاً بقه: هنستلم حبيبنا وضي عنينا الفوتوشوب .. ههههه .. وهنصدر ليه التصميم الفني اللي عملناه بايدينا أولاً .. واللي صممناه في برنامج "الخطوط المتجهة" ثانياُ .. عشان بقه نبدا شغل الاظهار الفني النهائي اللي هيخلي كل من شافه يقول: الله!!! .. ايه الروعه دي؟!! .. لا يمكن تكون انته اللي عامله!! . اشتريته بكام يا بكاااااااااش ؟!!! .. لطشته من فين يا نشاااااااااااااال ؟!! .. متخليش الاهانات دي تفت في عضد فنك الكريم .. اعتبرها اشادات بس بشكل معكوس (زي محنا متعودين في كتير من أمور حياتنا .. متزعلش ومتاخدش في خاطرك الغالي .. قدرنا كده .. هنعمل ايه يعني؟!! .. بس مسيرنا هنتغير للأفضل عن كده .. تأكد من ده) .. المهم انظر ليها على انها اشادات ضمنية وانته هتتقبلها بصدر رحب .. ما علينا ..... المهم بقه اننا هنا هنتعلم حاجات كتير عن اختيار وتوظيف الألوان والملمس .. الـ texture يعني .. والاضاءة والسرعه وحاجات كتير غيرها أكيد أكيد مش هيضيع وقتنا وجهدنا الغالي في تعلمها وممارستها

***
ده كان موجز الدروس الفنية بالتفصيل!! .. هههههههههه .. قال موجز بالتفصيل قال .. ههههههه .. تيجي ازاي بس دي؟ .. موجز وبالتفصيل؟!! . ما علينا .. أهو الفن كده ... عاجبكم عاجبكم .. مش عاجبكم لازم يعجبكم .. ههههههه

اختنا/ الطيبة .. عندها كل الحق في إنها تطلب مني أني أشوف رأي الأعضاء الكرام في خطة الدروس دي قبل ما اندلق على ملا وشي وأبدأ في الدروس وأورطهم فيها .. صح كلامك يا ستنا .. يا أعضاء يا كرام: ارجو منكم التكرم بابداء رايكم .. وبكامل الصراحة رجاءً في جدوى خطة الدروس اللي عرضتها عليكم (اللي فيها اولا وثانيا وثالثا) .. إن كانت مجدية .. هنتوكل على الله ونبدا الدروس .. وان كان شكلها معقدة وصعبة ومهياش اللي في بالكم .. ارجو انكم تقولولي ده . ابداً مش هزعل .. بالعكس .. هكون ممتن ليكوا وشاكر انكوا نورتوني باللي لازم أعمله .. يللا .. انا مستني رايكم الكريم في الخطة .. عشان نحدد الوجهه .. ونبدا المسيرة الفنية المظفرة بإذنه تعالى .. وزي ما اقترحت مشرفتنا الكبيرة في القدر والمنزلة/ عيناوية بجنون .. هنبدا ده في موضوع مستقل عن الموضوع ده .. كده صاغ سليم يا ستنا؟ . باذن الله هيكون صاغ سليم

***

قبل ما انهي الرغي ده .. اسمحولي ان أقف احتراماً وتقديراً لمشرفتنا الكبيرة في القدر والمنزلة/ ورق الورد .. اللي منوره الموضوع –ومنوره كل موضوع في الحقيقة- بحضورها الكريم وباهتمامها بيه .. وبقولها من أخ مقدر ليها ومعتز بمعرفتها:
والله ثم والله ثم والله يا ستنا ليكوا وحشة ميعلم بيها غير ربنا .. حقيقي انقطاعكم .. وانقطاع مشرفين غاليين زيكوا عن المنتدى مأثر فينا أشد التأثير .. نرجوا منكم ومنهم التلطف والتكرم والتجمل بالعودة الى سابق عهد حضوركم البهي ومشاركاتكم الكريمة .. وأنا واحد عن نفسي باتعهد ليكوا اني اكون في منتهى اللياقة والذوق والابد (اقروها الأدب .. الظاهر فيه غلطة مطبعية هنا) عشان متطفشوش من المنتدى

...

خلاص هتكتم أهه!! .. ههههههه
مستني ردودكم على سؤالي اللي فوق ترحيبي بستنا ومشرفتنا/ ورق الورد