LinkBack URL
About LinkBacks
[align=center]بسم الله الرحمن الرحيم، وبه نستعين
إنتاج العمل الفني له منهجية .. يعني أسلوب أو طريقة تقودنا من لا شيء (بداية العمل الفني) إلى كل شيء (نهاية العمل الفني) .. الانتقال ده من العدم إلى الوجود هوه اللي بيدي "المنهجية" أهميتها واهتمامنا بيها ...
بس قبل الخوض في "منهجية إنتاج العمل الفني" عاوز أثير النقطة دي وأحطها محل تساؤل ونقاش على شكل السؤال ده:
هل تجد / تجدين صعوبة أو شعور بالضيق أو الإحساس بأنه too much إننا نعمل حسب "منهجية" وخصوصاً في الفن ؟
اعتقد أغلبنا هيجيب على التساؤل ده بنعم (حتى أنا .. ههههههه) .. صحيح .. الإنسان مننا نفسه ومنى عينه انه لما يعوز حاجة تبقى تحصل الحاجة دي على طول من غير خطوات يتبعها أو مجهودات يبذلها عشان يوصل للي هوه عاوزه .. دي حقيقة لا نكاد نختلف عليها .. بس اللي كمان لازم منختلفش عليه هوه أن العمل (حتى الفني منه) حسب منهجيه حقيقي ضرورة ملحة لأنه بينظم وبيرّشد صرف جهودنا لإنجاز ما نريد .. والأهم من ده بيخلي نتيجة العمل الفني أجود وأفضل وأروع من الشغل العبثي (يعني اللي من غير منهجية)
أخي / أختي.. إن كنا نواجه مصاعب الالتزام بالعمل حسب منهجيه في حياتنا اليومية .. وإن كنا مقتنعين بأن العمل حسب منهجيه صحيحة هوه أنسب وافضل الطرق لإنجاز ما نريد .. تعالوا جميعاً عشان نمرن أنفسنا على الالتزام بالعمل حسب "منهجية إنتاج العمل الفني" هنا في هذه الدروس .. بإذن الله هنشوف انه مهما بلغت صعوبة ذلك واشتد عنته .. إلا أن الثمار اللي هنجنيها من ورا ذلك تستاهل بل وتستاهل بل وبالتلاتة تستاهل كل ده .. شدوا حيلنا .. واعقدوا النية وهيئوا العزم الصادق على خوض التمرين اللي هنمارسه هنا .. أصله إن مكانش الفن هيعلمنا ويمرّنا على الحاجات دي .. يبقى ممنوش فايدة ..
"منهجية إنتاج العمل الفني"
طريقة أو أسلوب إنتاج العمل الفني تتكون من أربع خطوات أساسية على الأقل:
الخطوة الأولى: الإعداد للعمل الفني (دي اللي هنتناولها في مجموعة الدروس الأولى)
الخطوة التانية: تصميم وتنفيذ العمل الفني (دي اللي هنتناولها في مجموعة الدروس التانية)
الخطوة التالتة: معالجة وإظهار العمل الفني (دي اللي هنتناولها في مجموعة الدروس التالتة)
الخطوة الرابعة: إنجاز وتصدير العمل الفني (دي اللي هنتناولها في مجموعة الدروس الرابعة والأخيرة)
وعشان بقه نمزج الدرس النظري بالتنفيذ العملي هيكون معانا موضوع رئيسي هنطبق عليه خطوات المنهجية خطوة خطوة .. الموضوع ده .. واللي أرجو انكوا جميعا تشاركوا في تطبيق الدروس عليه هوه:
تصميم شعار لدورة الخليج الثامنة عشرة اللي هتقام في عاصمتنا الحبيبة أبوظبي
ايه رايكم؟ .. موضوع حلو؟ .. ان كنتوا عاوزين موضوع غيره تبقوا تقولولي .. استبينا؟ .... بإذن الله استبينا
طبعاً حضراتكوا تقدروا في أي وقت أنكوا تسألوا أو تستفسروا أو تعلقوا أو تضيفوا أي حاجة في أي وقت .. العمل اللي هنقوم بيه عمل جماعي .. كلنا أستاذة وتلامذة في نفس الوقت فيه
نبدا الدروس على بركة الله وتوفيقه:
الخطوة الأولى من "منهجية إنتاج العمل الفني": الإعداد للعمل الفني (الدرس الأول)
الإعداد للعمل الفني يعتبر من أهم خطوات العمل الفني .. لأننا بنقرر فيه عدة أمور هتحدد وجهة العمل الفني، الأمور المهمة دي هيه:
* موضوع العمل الفني
* جو موضوع العمل الفني
* عناصر العمل الفني
* فكرة العمل الفني
كان ذلكم الموجز، وإليكم الآن شرح الخطوة دي بالتفصيل:
* تحديد موضوع العمل الفني
تحديد موضوع العمل الفني يعني تحديد عنوانه .. يعني العمل الفني ده هيعالج إيه وهيتكلم عن إيه .. مسلاً نحنا هنا حددنا موضوع العمل الفني بأنه تصميم شعار لدورة الخليج الثامنة عشرة .. يبقى موضوع العمل الفني هوه "تصميم شعار".
التطبيق العملي:
يللا معايا .. خلينا نبدا عملي .. هات شوية أوراق من اللي في الطابعة اللي جنبك وهات معاهم قلم رصاص كمان ومحاية (أصلي عارفك هتغلط كتييييييييير .. ههههههه .. لا .. أنا بهزر بس) .. مش راضي تقوم وتعمل اللي قلتلك عليه؟!! .. ليه بس كده؟ .. شكلك مش واثق في إننا بالطريقة دي هننتج حاجة روعه وهلمّه محصلتش!! .. ربنا يسامحك .. لأ .. حقيقي ربنا يسامحك .. أرجوك متحاولش تراضيني .. خلاص اللي كان كان وأنا واخد على خاطري منك .. إيه؟ .. قمت تعمل اللي قلتلك عليه؟ .. أيوه كده .. قوم عشان قلبي يبقى راضي عليك ويدعيلك بالخير .. جبت اللي قلتلك عليه؟ .. حلو .. يللا بقه .. اكتب في ورقة من الأوراق اللي جبتهم وفي راسها من فوق .. الكلام اللي هتلاقيه بعد السطر ده:
مشروع: تصميم شعار لدورة الخليج الثامنة عشرة (هنشوف لغاية فين هنوصل مع سي الأسطى زرياب ده!!)
الكلام الي بين القوسين اللي فوق لازم تكتبه .. والا مش هنكمل .. كتبته؟ .. أوكي .. يبقى نكمل
* جو موضوع العمل الفني
طيب .. دلوقتي وبعد ما حددنا موضوع العمل الفني .. نروح محددين جوه .. المقصود بالجو هنا هوه الطبيعة الدراماتية للموضوع، يعني هل:
الموضوع ده تراجيدي؟ ( يعني جاد أو حزين أو عاطفي .. يعني جو جد مش هزار)
أو
الموضوع ده كوميدي؟ ( يعني ممتع أو فكاهي أو فرفشي .. يعني جو هزار مش جد)
لازم ننتبه هنا لحاجة غاية في الأهمية .. الجو التراجيدي (المأساة) أو الكوميدي (الملهاه) كلاهما له دوره المعتبر في ملحمة (دراما) الحياه .. وعشان كده .. يبقى كلا الجوين شرعي وقابل للاختيار حسب الهدف اللي من ورا العمل الفني .. وكل ما الفنان نوّع أعماله .. يعني احتوت كلا الجوين التراجيدي والكوميدي .. كلما كان اكثر اتزانا .. وكان إنتاجه الفني أكثر قبولاً ونجاحاً .. أصل التمرس في الجو التراجيدي بيصقل وبيحد من غائلة المبالغات الزائدة عن الحد في الجو الكوميدي .. وكمان التمرس في الجو الكوميدي بيصقل وبيحد من غائلة المبالغات الزائدة عن الحد في الجو التراجيدي .. ارجو أنك تثق في إن الكلام ده ربما كان أغلى من الذهب زات نفسه!!
التطبيق العملي:
يللا نكتب في نفس الورقة وتحت العنوان اللي كتبناه الكلام اللي هنشوفه تحت السطر ده:
جو الموضوع: تراجيدي (جاد)
صحيح .. اصل مناسبة دورة الخليج مناسبة رسمية وبتعكس شخصية البلد المنظم .. وعشان كده لازم يكون الجو جو جاد .. جميل جداً
* عناصر العمل الفني
أوبااااااااااااااا ..... دلوقتي بقه هنستثمر ونستفيد من اللي قمنا بيه في الخطوتين السابقتين في تحديد عناصر الموضوع . عناصر الموضوع يعني الحاجات والأشياء اللي هنعالجها عشان ننتج العمل الفني .. لو تلاحظ معايا إن تحديد "موضع العمل الفني" هيساعدنا في تحديد أسماء العناصر دي .. بينما تحديد "جو العمل الفني" هيساعدنا في تحديد شخصية وطبيعة سلوك ودور العناصر دي .. شفت ازاي إن اللي قمنا بيه مكانش فشنك أو كلام فاضي؟ .. وده بردو بيخلينا نعرف ليه بعض الأعمال الفنية بتبقى فاشلة أو غير مؤثرة فينا .. لأنها يا إما بتكون عناصرها عبارة عن خلطة غريبة بتعبر عن عدة مواضيع في وقت واحد .. يعني فوضى .. أو يا إما بتكون شخصيات وملامح العناصر غير منسجمة مع بعض .. يعني إشي كوميدي على إشي تراجيدي .. فيبقى العمل الفني عامل زي برياني دجاج بالشوكولاته!! .. حاجة بتلوع الجبد!! .. هههههههههه .. مش صحيح كده؟ .. أكيد صحيح .. أو يا إما الحالتين معاً ..
التطبيق العملي:
يللا نكتب في نفس الورقة اللي هنشوفه تحت السطر ده:
عناصر الموضوع:
* كورة قدم (كورة مرسومة بشكل تجريدي رصين .. مش كوميدي .. أصلنا مش عاوزين ندحّك الناس بالشعار)
* علم دولة الإمارات العربية المتحدة (ده بس عشان اللي يشوف الشعار يعرف أو يفتكر إن الدورة دي إتعملت في دولة الامارات الغالية)
* بارجيل (لقطة لبارجيل تبين هيبته وعلوه في السما .. لقطه مهيبه عشان تدي الشعار هيبته وتخلي الواحد يحس بقوة المناسبة)
* سفينة شراعية (لقطة تجريدية لسفينة شراعية تمخر عباب البحر .. الجزء المسيطر واللي باين هوه انحناءة شراعها الكبير .. ده بيدي تلطيف وسمات الجمال في الشعار (الخطوط المنحنية هيه علامات الجمال حسبما يقول الخبراء!!)
لاحظ معايا إني أنا مكتفيتشي بتحديد مسميات العناصر وبس .. وأنما اتعديت ده وبينت جو وملامح كل عنصر منها .. طبعا تحديد العناصر وملامحها كان على ضوء عنوان الموضوع وكمان جوه .. لولاهم مكنتش وصلت للانسجام ده في العناصر وخصائصها
إيه؟ .. ايدك بتاكلك عاوز تبدا الرسم والشغل الفني بأه وتسيبك من الكتابة والتعبير الانشائي ده؟ .. هههههههه .... سدأني كل واحد عنده التحفز ده والشعور بالملل من اللي نحنا بنعمله لغاية دلوقتي .. بس معلش .. الصبر جميل .. خليك مؤمن بده يا مسلم .. بس ببشرك إننا خلاص هنبدا بعد شوية الرسم والفن .. يللا معايا على الخطوة الجزئية الأخيرة من خطوة الإعداد للعمل الفني من "منهجية إنتاج العمل الفني"
* فكرة العمل الفني
أوبااااااااااااااا .. دلوقتي بقه هنبدا الإبداع والفن .. هنكّون فكره بنت جنيّه .. هههههههه .. من العناصر اللي حددناها فيما سبق .. بس إزاي هنعمل ده .. خد بالك الغالي معايا .. عشان نقدر نكون فكرة قوية وحلوة لازم نعمل زي ما بيعملوا في الافلام .. لازم نحدد "البطل" أو "الأبطال" من العناصر دي .. يعني اللي من المفروض انهم يلعبوا أدوار رئيسية ومهمة .. وكمان لازم نحدد "الكومبارس" أو "الكومبارسات" .. يعني اللي من المفروض انهم يلعبوا أدوار ثانوية ومساعده .. وبعدين نحط أو ندي العناصر البطلة مواقعها وحجمها من العمل الفني اللي بتعبر عن بطولتها .. وكمان نحط أو ندي العناصر الكومبارسه مواقعها وحجمها من العمل الفني اللي بتعبر عن كونها ثانوية ومساعدة .. ونحاول نوجد منطق لعلاقات فيما بينها .. دي حتة خطيرة أوي!! .. "نوجد منطق لعلاقات"!! .. أيوه .. أصل المنطق ده هوه سرّ الابداع في العمل الفني .. ولذلك بتلاقي إنه بالرغم من تشابه العناصر وحتى جوها في أعمال فنية متعددة .. إلا إنها بتفرق عن بعض وربما بشكل كبير!! . ده طبعاً مردّه إلى "منطق العلاقات" المختلف فيما بين تلك العناصر .. "منطق العلاقات" هوه نفسه "الحبكة الفنية" اللي في كتابة القصص .. يعني اللي بيديها تفردها وروعتها .. وعشان كده لازم هنا نوظف قوانا المبدعة والخلاقة في الاتيان بمنظومة علاقات فيما بين العناصر دي تكون:
* حقيقي وبشكل مؤثر وبليغ بتعبر عن الهدف من العمل الفني وبتلعلع بموضوعه
* جديده ومتفردة وأصلية .. يعني مش مستهلكة أو معروفة أو تقليدية
عملية صعبه؟!! ... مبنكرش ده .. بس اللي بيساعد على إنها تبقى سهلة نسبياً هوه تشغيل إيدينا!!!! .... أيوه ... تشغيل إيدينا .. دلوقتي هنبدا نعمل اسكتش جداً مبسط لفكرة العمل الفني .. خد راحتك أوي هنا .. حرّك إيدك بكل راحة وبكل تلقائية .. وكلما شفت إيدك أو نفسك منجرفة ناحية فكرة معينة بقوة وبسهولة .. إبقى إعرف إن الفكرة دي تقليدية ومستهلكة!!! .. نعم .. بالزبط كده .. أصلك هتبدا –ولا مؤاخزة في الكلمة دي- باجترار الأفكار اللي بتعرفها .. مش مشكلة .. بس المهم هنا إننا ننعتق من الأفكار التقليدية اللي بنعرفها .. أحسن طريقة لتحقيق ده انك تبدا من الأفكار التقليدية دي .. تبدا وبس .. لكن يجب أنك تنتهي بحاجة مطوّرة عن الحاجات التقليدية دي .. انته هنا محتاج راحة .. وتلقائية شديدة .. وتحرر من أيتوها قيود .. وعشان كده .... برجوك وبتوسل إليك .. أبداً أبداً متجيش في الفترة دي يمة لا الأدوبي أليستريور أو الكوريل درو ولا طبعاً الفوتوشوب .. دي أدوات قاتلة للإبداع في المرحلة دي ... أرجوك سدأني لأني حقيقي خايف على قواك الإبداعية من إنها تتوئد بسبب البرامج دي .. شكلي برغي كتير؟!! .. صحيح .. برغي كتير .. بس ده طبعا لسببين زي منتوا عارفين، همه:
* أول سبب إن الحتة دي هيا أخطر حتة في العمل الفني الحديث .. يعني بعد دخول الكمبوطر في الفن .. سهولة العمل على الكمبوطر -يعني الـ PC يا أخي- بيخلينا ننجرف ليه من دون وعي أحياناً .. بس للأسف .... إغراء السهولة ده بيكون ضحيته الإبداع في كثير من الأوقات!!!
* وتاني سبب هوه لأني بالع صابونه زي منتوا عارفين ... هههههههه .. مش برغي؟!! .. أبقى بالع صابونه (على فكرة .. فيه ناس عندها عقدة أكل الصابون!! .. تسدأوا بده؟!!! .. هههههه .. يللا اعترفوا .. مين غيري منكوا عنده العقدة دي!!!)
طيب مننتقل للعملي عشان بس نعرف إزاي ممكن يحصل ده
التطبيق العملي:
تعالوا نقرر التالي:
عناصر: الكورة والبارجيل هيّه اللي هتكون العناصر البطلة .. يالله .. مبروك عليكي يا عناصر .. هههههههه
عناصر: العلم الغالي والسفينة الشراعية هتكون العناصر الكومبارس .. معلش ... متزعلوش .... مهو النبي عليه الصلاة والسلام بيقول فيما معناه: "خادم القوم سيدهم" .. وبعدين يا بخت من خدم ولا اتخدم (طبعا انتوا عارفين معنى كلمة اتخدم يعني إيه .. اتخدم يعني اتخدم .. هههههههه .. ربنا يعينه على اللي هيصيبه من ورا الخدمة دي .. هههههه)
وكمان تعالوا نقرر المنطق التالي:
طيب .. إيه يجرى لو خلّينا البارجيل (البطل) في نص الشعار .. آها .. وخلّينا الكورة (البطلة) جاية لافه من حوله وواخده مسار على نفس شكل الشراع (الكومبارس) اللي واخد ألوان علم دولة الامارات الغالي (الكومبارس) واللي زات نفسه –يعني الشراع- لافف حول البارجيل العتيد؟!! .. مش برضه فكرة ممكن تكون حلوه؟!!! .. طيب منعملها سكتش بسيط زي اللي تحت عشان بس نتصور إمكانياتها وازاي ممكن نطورها عشان تبقى جميلة:
شفتوا ازاي في الاسكتش الأخير طورنا الفكرة وخلينا الشراع اللي متلون بالعلم الغالي حاضن الكورة بدل ما كانت الكورة طايرة على حافته؟!! .. يعني غيرنا منطق العلاقات؟!! .. وماله .. ميتغير .. نحنا فنانيين .. يعني مش متقيدين إلا باللي نشوفه أفضل .. كمان ده بيوريكوا إزاي عمل اسكتش للفكرة بيدينا فرصة نختبرها ونشوف حتبقى إزاي .. دلوقتي أعتقد أن الكورة في وضعية مركزية أفضل من لو كانت على حافة الشراع ..
عارف انكوا هتلاحضوا وجود أشياء غريبة في الصورة .. يعني ايه مسلاً حكاية المفك (الـ screw driver) والمشرط في عمل الاسكتش .. بس طبعاً أنا هرد عليكوا وبكل عنجهية فنية:
دول بس عشان نزبط بيهم الاسكتش ونعمله أي عملية جراحية فنية متطلبه ... هههههههه
***
دلوقتي دي هتبقى فكرتي في تنفيذ الشعار لأني بشوفها أفضل:
لالالالا .. متقولوش الرسم ركيك أو مش حلو .. الغرض من الاسكتش مش النشر .. الغرض منه بس وضع فكرة مجردة لا غير .. التجميل والشغل الفني هنعمله بعدين .. إنتوا بس إلقطوا نفس زي ما بيقول المسل وإستأنوا حبتين علينا وامشوا سنّه سنّه ... ههههه
***
أسيبكوا دلوقتي تجربوا بنفسكوا عمل الاسكتش ده أو غيره .. خدوا راحتكم وشغلوا إيديكوا في بقية الورق اللي معاكوا عبال معملكوا الدرس التاني .. وطبعاً متنسوش تستفسروا أو تعلقوا على الدرس زي ما تحبوا .. حروف كلماتكم غالية أوي عندي .. يعني متحرمونيش منها أبداً .. أشوف وشكوا على خير .. ومع السلامة .. والحصة انتهت .. دلوقتي كلكوا هتقولوا وأنا أولكم:
هييييييييييييييييييييييييييييه .. فسسسسسسسسححححححححاااااااااااه .. هههههههههه[/align]
رد مع اقتباس
[/align]
