الموضوع: الرجاء من الجميع تقبل الموضوع ومناقشته إيجابياً

السلام عليكم ورحمة الله وبركاته

في البداية أعرفكم بنفسي أنا طالبة من طالبات التقنية العليا وتخصصي Graphic ويوم سجلت في هالمنتدى قلت إن هذا منتدى محلي فيه أهلنا وناسنا وتوقعت إني بلقى إمارة واسعة تتضمن العديد من الدروس والأشياء الحلوة بس للأسف لقيت المشاركات وايد ظئيلة وما تتعدى الصفحة أنا أوجه كلامي كاقتراح ليش ما ننمي هذي الإمارة أنا ما أتكلم بصفتي طالبة تصميم لكن كأي وحده تحب الإبداع والعمل الفني أو تحب تتعلم على برامج التصميم، من جهتي أنا مستعدة أعلم أو أساعد أي وحده في برامج التصميم شرى الفوتوشوب والكارول درو والفلاش بس أترى الدعم النفسي أو التشجيع من الاعضاء اللي حابين يتعلمون واللي حابين ينمون موهبتهم، واسمحوا لي أحس إني طحت فيكم وايد من أول ما سجلت
آسفة على الإطالة وانتظر منكم ردودكم ولا تنسون إن كلامي مجرد رأي

إختكم
إمـــــــــــاراتية للأبـــــــــد

يالله شدي همتج ونحن بندعمج بالي تبغينه
قو هيد ماي سيستر

[align=center]إماراتية للأبد

هلا وغلا اختى الكريمة

انا معج ابي اتعلم الفوتوشوب

يا ليت تحطين دروس تعليم الفوتوشوب

تسلمين يا رب

اختك

بنت قطر[/align]

يا سبحان الله .. لو انك انتظرتي لليوم كنت راح تقرئي موضوعي يالي كنت ناوي اكتبه عن هذه النقطة.. وهي عدم تفاعل الأعضاء مع المواضيع الجديدة أو التعليق على أي تصميم بالموافقة أو بعدم الموافقة.. أو حتى الانتقاد .. حيث أن طبعة أي مصمم يحتاج للانتقاد حتى يحسن من تصميماته المستقبلية.. وزرع روح المثابرة والخروج بعمل يرضي جميع الأذواق على قدر الامكان..
لذا ما أتمناه هو تفاعل أكبر عدد ممكن من الأعضاء ..
ولكم جزيل الشكر والتقدير..

ABo Elwalid

إماراتية للأبد

هلا وغلا

يا ليت تحطين دروس تعليم الفوتوشوب

تسلمين يا رب

السلام عليكم
شكرا لتفاعلكم معاي في الموضوع وإن شاء الله راح أبدأ انزللكم الدروس بالشرح والصور على السبت الياي لأن عندي امتحانات الفاينال وبنت قطر انتي تامرين أمر وانت بعد اخوي كافاريج ويا بو الوليد يقولون من سبق لبق
وجزاك الله خير يا ملك التزويد
إختكم إماراتية للأبد

يلا اختي نترياج تعلمينا الفوتوشوب

و اللي نعرفه ما بنبخل به إن شاء الله على الأخوة و الخوات في المنتدى

يزاج الله خير و بارك الله فيج

صباح الخير
الله يسدد خطااااااااااااااااااااج وشدي الحيل والهمه كلنا بنتظار الجديد

السلام عليكم ورحمة الله وبركاته.

حياك الله الأخت الكريمة (إماراتية للأبد) سعدنا بانضمامك إلينا ... وبانتظار مشاركاتك.

مجرد للتنبيه .. تم وضع خيار مشاهدة المشاركات منذ شهر كخيار افتراضي .. ولهذا لم تتمكني من مشاهدة جميع المشاركات .. عليك بتغير الخيار الى (البداية او السنة الماضية) لتتمكني من مشاهدة المشاركات القديمه التي تتعدى ال 25 صفحة في 50 مشاركة في كل صفحة.

اختي العزيزة
اشكرج على روحج الطيبه والمحبه لنشر الفائده

وانتي وعدتيني تعطيني دوره في الفلاش...والاخوات طلبن في الفوتوشوب...فرصه يعني تعطينا دورتين...وكل دوره حطيها في موضوع منفصل واللي يحب يشارك ينضم...

والاخت تستاهل الدعم والتشجيع والشكر لانها فعلا انسانه معطاءة

عاد اتريا انا تعلميني الفلاش

تحياتي لج
بنت الدار

من عيوني بنت الدار

تعرفين حالتي واااااايد بزي صح

على كثر ما ادخل امارة الجرافيكس ،، ومع اني ارتاح اكثر شي في هالاماره (طبعاً بالاضافة لإمارة الكمبيوتر والانترنت) ،، توني شفت هالموضوع !!


يمكن لأنه مثبت فوق ،، وانا اطالع المواضيع اللي تكون بالنط العريض (يعني يديده او فيه حد شارك فيها) !!

ومع اني حاس انني جيت متأخر ،،بس ما عليه ،، يمكن اللي بقوله يكون مفيد .

بسم الله نبداً

شغلة التصميم من الشغلات اللي يبرز فيها الذوق أكثر من التخصص أو الدراسه ،، مع اني درست جرافيكس ،، لكن كل اللي ممكن ناخذه بالكليات أو الجامعات ،، هو بداية الطريق فقط !

نحن اللي نطور انفسنا ،، ولو تلاحظين يا اختي اماراتيه للابد ،، التصاميم حتى لو كانت تتكلم عن موضوع واحد (كمسابقة مثلاً موضوعها واحد) ،، تختلف عن بعض بدرجة كبيره ،، تحس بلمسات اللي مصمم التصميم ،، ولو كان محترف ،، راح تكون تصاميمه تعبر عن شخصيته ،، مب بس ذوقه.

اللي خلاني اقول هالكلام ،، ان اللي مبتدي أو حتى متوسط ،، يوم يجي يسوي تصميم يضرب في باله شغلات وايد (كيف اقدر اميل الكلمه الفلانيه - كيف الكتابه الفلانية طالعه من قلب التصميم - كيف امزج الصوره هذي مع صوره ثانية ،،) << لاحظي ان التفكير في طريقة حوسبة التصميم طغت على خياله الابداعي ،، وحتى لو كان انسان ذووووووويق ما راح يكون بالجوده اللي تخلي الواحد يتم يطالع للتصميم ساعه أو ساعتين !!

يمكن تستغربين من هالشي ،، فعلاً انا جلست قرابة الساعه ويمكن زياده أطالع تصميم ،، وكان مسويه صاحب موقع المصمم (والموقع هذا مشهور جداً) ،، لكن حسافه رحت عقب فتره ادور على التصميم ما لقيته .

انا مابي اطول في الكلام ،، اللي ابي اوصل له ،، اننا نتعاون يد بيد ،، لين نقضي على مسألة كيف .. كيف .. << نطلع في نتيجه ان العضو الحين يعرف اي ميزة موجوده بالبرنامج اللي يشتغل عليه ، عشان يتفرغ لتواصيف التصميم نفسه ،، وساعتها راح يبدع براحته.

عارف ان المسالة صعبه ،، لأننا ما نقدر نشمل كل امكانات البرنامج (الفوتوشوب مثلاً) ،، وانا عن نفسي أي تصميم بسويه أو طريقه معينه ابي اوصله ،، راح تكون عباره عن عرض فلاشي ،، حتى نختصر الكلام اللي يملل الواحد ،، ويكون الشرح واضح ومفهوم .


ختاماً (شكل هالبروفيسور ما بيخلص ) << لا هالمره نوينا ننهي الحوار

نصيحه لوجه الله ،، لا تقابل الفوتوشوب ،، وتقول ابي اسوي تصميم حلو ومافي راسك فكره !!

صدقني راح تسكر الفوتوشوب ،، ويمكن تسكر الكمبيوتر بكبره

خذ لك ورقه ، واكتب الخطوط العريضه (افكار التصميم الرئيسيه - تفاصيل بسيطه) ،، وشخبط على راحتك ،، لين تتكون الفكره في راسك ،، وعقب افتح الفوتوشوب ،، واتفنن.

صدقوني وانا جربت الشغله هذي ،، راح تطلع بالاخير بتصميم ما كنت متوقع انك تسويه ولا طرا على بالك .


ربي يحفظك يا اختي اماراتيه للابد ،، واعتبريني ذراعك اليمين بهالاماره ،، والله يسهلها

دمتي سالمه .